كل سنــــــه وانت طيب

النهارده تكمل 11 سنه .. يااه عدوا بسرعه كده

قعدت افتكر فيهم حاجات كتير .. من اول ماكنت واخد الشكل الموحد لجميع الاطفال وانت مولود

واما كنت بتريل عليا ( معفن من يومك ومبهدلنى ) افتكرت خناقتنا اما كنت عايز تشغل الكارتون الاهبل بتاعك وانا عايزه اشغل سكوبي دوو و فى الاخر تقوللى متزعليش انا هشغلك بتاعك ( وانا معنديش دم .. اشغله برضو ) افتكرت اما قولتلهم فى المدرسه انى اختك ومامتك تحاول تفهمك انى خالتك واختها هى مش انت .. تزعل وتقوللها دى اختى انا مش اختك انتى

و 11 سنه ولسه بتنادينى بأسمى حاف كده ( عموما انسي الموضوع ده اما اكمل 30 سنه )افتكرت حاجات كتير قوى اهمهم ... انك كبرت .. كل سنه وانت طيب

واشوفك تكبر اكتر وتكون حاجه كبيره وتكون عزه للاسلام انت واخواتك

كل سنه وانت طيب ياطـــارق

أجمل مدينه فى مصر

مع انى كنت محضره موضوع تانى خالص بس اول امبارح عرفت ان امتحاناتى فى اول شهر 6 حد هيقولى عاضىىىى بتحصل يعنى .. هقولكوا لا .. لانى كنت متأقلمه نفسيا انها اخر 6

المهم انا تمالكت نفسي بعد مااكتشفت انى لازم اخد فكره عن المنهج وقررت ( يسلاااام .. ولا كأنى وزير الزراعه ) انى انزل اودع العالم الخارجى بكل الحاجات الجميله اللى فيه وآكل بيتزا واشرب نسكافيه

وقررت لتانى مره ( تصريحات ياجماعه .. ركزوا ) انى مش هبخل عليكوا ولا هستخصر فيكوا صور العالم الخارجى اللى صورتها وبالمره تعرفوا النعمه اللى احنا عايشين فيها

دى متعلقه جنب قسم الانفوشي .. اتفضلوا معانا

مركب صيد

هو ده البحر اللى بتسمعوا عنه فى الراديو

ودى الصخور اللى فى البحر

دى مركب صيد .. اظن واضحه جدا

مأذنه مسجد المرسي ابو العباس

بحر .. ومراكب .. وسما

سور قلعه قايتباى

السراديب داخل القلعه

الحمامتين بتوع السلام استقالوا وحاليا بينشطوا حركه السياحه

دلوقتى كل واحد يلبس نظارته ويركز .. الشيء الابيض الدائرى البعيد ده مكتبه اسكندريه

ده بحر تانى

كل واحد يروح يشوف مذاكرته بقي و قبل ماانهى الموضوع ومن على هذا المنبر وهذه الصفحات بتوجه بالدعاء لجد جدى الكبير بحق الصدقه الجاريه اللى عملها فينا اما نزح للاسكندريه