نظرا للوضع العام والخاص فكرت اخد هدنة مؤقتة ، بديهيا هبدأ بعدم متابعة الاخبار ، تفادى الاشخاص المستفزين بحياتى ثم التجديد كل يوم اعمل حاجه جديدة او حاجة بتسعدنى او حاجة بقالى كتير معملتهاش ربما لا يجدى اى شيء من اللى بعمله وجايز مش ده اللى يخرجنى بره جدران نفسي ... بس على الاقل هكون حاولت
السبت
سهرت للصبح ، شوفت الشروق ، لون السما وهى بتنور حبة حبة ، العصافير وهى بتلعب مع بعض ، وقطة جيراننا وهى قاعدة بالاطة على السور
الاثنين
روحت لبابا وقعدت معاه كتير
الثلاثاء
النهاردة اليوم الفنى ، وده علشان اتيح الفرصة للفنان الكامن فى اقصى اعماق نفسي بالخروج والافصاح عن ذاته ، لونت ورسمت
حد هيسألنى سؤال وجيه ، ياترى ايه البتاعه اللى فوق دى ؟!!!دى عقدة طويلة وقاتمة شوية داخل االفنان المقيم بأعماقى
الاربعاء
ولانه الاربعاء فلازم يكون اكتر يوم مميز بالاسبوع ، فنزلت اشتريتلى هديـــة وكمان لفيتها
ومن خلال الهدية دى قررت احقق امنية قديمة من الطفولة من ايام ما باظ الكلب اللى بالريموت بتاعى وانا 7 سنين وكان نفسي فى عربيه بريموت ، اينعم خذلت احلامى – ككثيرين – وطلع السلك بتاعها قصير شوية بس شغالة وبتؤدى وظيفتها على قد ما تقدر
الجمعة
يوم الاثار
النهاردة طلعت صندوقى الخاص و ورقى - جواه حاجات عتيقة جدااااا – مذكراتى وانا فى ابتدائي صورنا انا وصحابي واحنا فى ثانوى الحاجات اللى كنت بكتبها فى حصة الكمياء اول كارنية للكلية مشابك غسيل واقلام ورق جرايد ، الورق اللى بكتبة لصحابي وسط المحاضرات – كانت نتيجة الورق ده واحدة اتطردت والتانية اتسحب منها الكارنية وطبيعى كنت انا البرئية اللى مبتكلمش و منتبهه مع الدكتور - اللى كنت نادرا اما بحضرها ، يوم تخرجى مع بابا وماما ، حاجات مطبوعة جوه قلبى طبع عليها الزمن لونه وريحتة ولسه رغم كل شيء قادرة تحرك جوايا ذكريات كتيرة
الصندوق فكرنى بحاجات كتير ، كنت بقول لنفسي لو حبيت هحتاج لعمر كامل اعرف فيه كل حاجة عنه ادق تفاصيليه كأنى مغبتش لحظه عنه من قبل ما نعرف بعض ، اخلية يفتح اوراقى وصندوقى اللى معرفش بصمة ايد حد غيرى ومساحات عذراء جوايا معداش عليها آدميين قبله
بس صندوقى – زى قلبي - غالى اوى مش هيفتحه الا اللى يستحقه وغالبا نويت ارحلهم معايا على الجنة بأذن الله
المهم
ان فيه مشاريع مؤجلة ، اكتشاف مكان جديد ، حضور عرض القبة " رحلة كونية " وده مؤجل نظرا للاقبال الرهيب على القبة السماوية ، يوم للتصوير ... وغيرهم ، و ذلك لعدم اتاحة الوقت
ملحوظة
من على هذا المنبر ، ارفع قائمة مطالبي كمواطن مصرى داخل على امتحانات
اولا : ياريت تدعولى
ثانيا : الدعاء يكون بذمة وضمير
ثالثا : مع مراعاة انه هيبان دعيتوا بذمة ولا لأ اما تطلع النتيجه
7 comments:
ربنا معاك
وشدي حيلك
وكلنا بندعيلك
جميلة اوي لعبة العربية ام ريموت
اما تزهقي منها مش ترميها
انا عندي سهيلة وجومانة ممكن يستعيروها منك...!
((((((((:
الف مليووون ترليووون حمدلله على سلامتك اشرقتى اخيرا كالف شمس ومليون قمر فى عالمك الازرق الذى لا يكتمل جماله من غير وجودك الاجمل
اسبوع اكتر من رائع اهنيكى عليه ربنا ميجيبش اكتئاب ويجعل ايامك كلها اسعد
مكنتش متخيله ابدا ان رسمك جميل كده بس الفنان روحه جميله وطبيعى ان ان يكون رسمك جميل لان اكيد مفيش اجمل من روحك
فكره القبه ممتازه انا بقترح عليكى تروحى يوم الاربعاء بما انه الاجمل عندك بس روحى من بدرى علشان تلاقى مكان طالما زحمه كده
اخير خدى بالك من نفسك ذاكرى كويس كلنا بدعيلك طول الوقت ان ربنا يديلك احسن ما عنده دنيا واخره .. بذمه والله وضمير :)))
أنا غالباً همشى على نفس روشتتك مع بعض التعديلات
شكراً بجد!..
ربنا يوفقك :)
الف حمد الله علي سلامتك :)...ويالها من هدنة رائعة في مجملها , وارجو ان تستمري علي هذا النهج مستقبلا ...حتي تكون العودة اكثر تألقا وانجازا .
تمنياتي لك بالنجاح والتوفيق ...وارجو ان يتقبل الله منا ومنك الدعاء والرجاء .
مساك الله بالخير والنور
و النور نور القلوب والبصائر
أنار الله قلبك وبصيرتك بنور الإيمان
اللهم آمين
و كل عام وانتي بخير ومبارك رمضان
رزقك الله صيامه وقيامه
اللهم آمين
جميل ما سطرت أناملك من حياة
نمر بها ونمقتها فتقذفنا وتهجونا ونهجوها
لنعود في احظانها
هذه هي الحياة الدنيا
يوم لك ويوم عليك
ويوم لا لك ولا عليك
دائماً كنت أفتش ماضي العمر
لأقول ما الفائدة مني
لم لا أرحل لأريح وأستريح
فأنا مصدر إزعاج ومنبع هموم
وحياتي بلا قي قي (قيمة)
أحمد الله أن رزقني العمر لأصحح نظرتي
ولأعود الى درب نجاتي خاضعاً لربي
وهذا هو منبع كل سعادة
, فليس علينا إلا أن نرتمي في إستسلام
طائعين راغبين لنطلقها عالية
(ربنا الله)
أي والله إنها الطمانينة المطلقة
فمن تعلق بالله كفاه الله
وأغناه عمن سواه
أعذريني على الإطالة
كوني سعيدة وكرريها (ربي الله)
إستشعري عظمة الله ورحمته
لك مني محبة في الله
مبرووووووك الهدية
واللهم بحق اليوم المفترج ده يرزقك
not a present but the present!
بيتنا القديم
ده اللى معملتش حسابة
تطمعوا فى العربية و هاخدها شوية وارجعها وتختفى عربيتى للابد
بس ممكن تبعت سهيلة وجومانه يلعبوا بيها كل يوم ثلاثاء نص ساعة
sarayosif77
شكرا على المرور
وجزاكِ الله خيرا على الدعاء
ابتسام مختار
ربنا يسعد قلبك
وان شاء الله تجيب نتيجة
نورتينى
اندروميدا
الله يسلمك
مازلت بحاول ..رغم انى مش عارفة امتى ولا ازاى هكون انا تانى؟
بس ثقتى فى ربنا كبيرة و بلا حدود
اللهم آمين
شكرا على الدعاء
بس ركز معايا فى رمضان اكتر
دمت بكل الخير
غريب
اعتقد اننا نتعرض لما مررت به باختلاف ظروف حياة كل شخص عن الاخر البحث عن قيمة لذاتك او حياتك على الاخص
وتلك هى نعمة الالم التى تعود بنا لله ، انه ليس لك سواه وحده لا اله غيره
شكرا على تعلقك الذى اضاف الكثير
نورتنى بزيارتك
سابرينا
اكيد مفيش حاجه مستحيلة عند ربنا
بالرغم انى مؤخرااقتنعت انه كائن اسطورى منقرض
اسعدنى مرورك
ربنا يرزقنا بيها جميعا اللهم آمين
يارب يرزقك الجنه
بس المنقرضين فى عصرنا اكيد هيكون فيه منهم بالجنة
Post a Comment