Sunday, November 6, 2011

بين الســعادة ... والبكاء



لعيد الاضحى طقوس خاصة ، أفتقدها هذا العام من اول شراء الخروف قبل العيد بأسبوع " كان بابا بياخدنى انقيه معاه وانا شحطة كده " ، شراء مستلزمات العيد و صلاة العيد ثم الذبح الذى فى العادة لا احضره " اوصل بابا عند الجزار ويرنوا عليا اما يتموا الجريمة كاملة " اشياء كثيرة اهمها انى افتقد ابي بشدة


**********************


احرص كل عيد على شراء هدية بسيطة لكل من حولى ، بنية ادخال السرور على قلب مسلم فى العيد ، جرب هذا الامر ستجد ان السرور سيمتد ليلقى بظلاله على قلبك انت الاخر ، ثم ستمتد العدوى الاجتماعية لتشملك انت ايضا ممن حولك ناهيك عن المودة التى ستشعر بها تحيط بك وستجد ان الله – لانه كريم على عبادة – سيرسل لك " فرحة ما " لا تعلم من اين اتت


********************


تسائلت عن امكانية ان ادعو الله فيستجيب لى فأ نتقل من حياتى الى الحياة الاخرى التى يتواجد فيها ابي فأقضي معه يوم واحد فقط من ايام العيد الاربعة ، أقبله واقول له : كل سنه وانت طيب يا بابا... ثم اعود ؟؟؟



********************


فى احدى لحظات التجلى الفكرى التى مررت بها ، وجدت انه اليوم الاخير لكل الخرفان والابقار التى تأهبت للذبح اول ايام العيد ، لكنى تداركت انه لايهم انه اليوم الاخير قدر ما يهم ان حياتها كلها كانت لله .. حتى النهاية


********************

ملحوظة


حد ممكن يسأل ايه علاقة صورة القطة اللى فوق بالموضوع ، وهى فعلا لها علاقتين مش علاقة واحدة

اولا : ان انا اللى كاتبة الموضوع ، وانا بحب القطط
ثانيا : ان القطة حيوان أليف و متدلع يختلف شكلا وموضوعا عن الخروف - وده لا يعتبر تقليلا من الخروف - لذلك من قبيل التغيير وتعبيرا عن الحالة المزاجية للموضوع أطل عليكم القط الامور اللى فوق ده


******************


كل عام وانتم جميعا وكل الامة الاسلامية بكل الخير ، رزقنا الله و كل مشتاق زيارة بيته الحرام
كل عام وانتم بخير

11 comments:

Unknown said...

وجعتي قلبي و الله العظيم
رحم الله أباك ..
و كل موتانا
غفر الله لنا و له و عفا عنا و عنه ..
كل سنة و انتي طيبة يا حبيبتي ..
و أسأل الله أن يرسل إليكِ الفرح من حيث لا تدرين ..
اللهم ارزقها الخير و السعادة ..
و اجعل حزنها بردًا و سلاماً

موناليزا said...

انتى جميلة اوى على فكرة
وكل سنة وانتى بألف خير
وربنا يسعدك يا حبيبتى

البنفسج الحزين said...

كل سنه وانتي طيبه وفي أسعد حال يا رب

إنسان || Human said...

وأنا كمان بحب القطط .. فادي اني اشوف صورتها من غير ما يكون بينها وبين الموضوع أي علاقة .. عادي جداً ... بالنسبه للموضوع الرائع ده وذكرياتك وتأملاتك المثمرة ......التي تنم عن شخصية رائعة

واللي استفدت جداً منها على المستوى الشخصي ... خاصة في موضوع إدخال السعادة على الأخرين

دمتى بسعادة .... وطالما نحن بسعادة فأحبابنا الذين رحلوا بسعادة أيضاً

rona ali said...

كل سنه وانتى طيبه ولو و انها متاخره

عجبنى الجزء بتاع بابكى ربنا يرحمه ويسكنه فسيح جناته
والجزء بتاع الهديه


انتى جميله اوى من جواكى
ودة ظاهر لينا مش محتاج انى اعرفك كويس علشان اقول كدة

تحياتى ليكى :)

اقصوصه said...

رحم الله والدك واسكنه فسيح جنانك

اتمنى ان تكوني قد قضيتي غيدا سعيدا

عالمى ازرق said...

شيماء

سلامت قلبك
يارب يرحمة ويغفرله ويسكنه الفردوس الاعلى ويرزقة رؤية وجهه الكريم

وانتى بكل خير وراحة قلب
وجزاك الله كل خير على دعائك
نورتينى





موناليزا

انتى الاجمل
وانتى بكل خير وسعادة دايما يارب

دمتِ بخير






البنفسج الحزين

وانتى بكل خير انتى وكل احبتك بأذن الله






Hu-man

كده هملأ المدونة صور قطط وانا مطمئنة
شكرا ليك ... واتمنى انى اكون وصلت ولو فكرة صغيرة
جرب موضوع الهدايا واستمر عليها ، مش لازم الحاجه اللى نعملها تثمر نتائجها - فى السعادة - من اول مرة ، المهم اخلص فيها النية اوى من غير ما تستنى مقابل

اسعدتنى زيارتك







rona ali

ولا يهمك وانتى طيبة وبخير دايما
يارب يرحمة ويغفرله ويجمعنا بيه فى الفردوس الاعلى اللهم آمين

انتى الاجمل
اللهم اصلح لى نفسي واغفر لى مالا يعلمون

شكرا على المرور الرقيق




اقصوصه

اللهم آمين ويجازيه خير الجزاء عن كل حاجه علمهالى واحسن تربيتى عليها

دمت بكل خير

وصف الاحساس said...

كل سنه وانتي طيبه يا قمر
وربنا يرحم والك ويغفر له ويسكنه فسيح جناته
مدونتك حلوه اوي وان شاء الله ارجع افرها كلمه كلمه
تصبحي علي خير
تحياتي

عالمى ازرق said...

وصف الاحساس

وانت بكل خير
يارب اللهم آمين
وفى انتظار تكرار زيارتك

اسعدنى مرورك

faroukfahmy said...

رحم الله اباك يا حبيبتى
كل سنه وانت تتذكرى ذكراه الحميمة
اللهم ارزقك الخير والعافية
فشلت فى الاشتراك مع متابعينك حتى ارى اعمالك فى لوحة تحكمى لذا اطلب منك ان تشتركى فى متابعينى وتزورى مدونتى عسى ان تجد عندك القبول والرضا
الفاروق

عالمى ازرق said...

faroukfahmy58

اللهم آمين هو وجميع موتى المسلمين
جزاك الله خيرا على الدعاء

للاسف لا اعرف كيفية الاشتراك فى المتابعين لكن المدونات التى اتابعها اضع رابطها فى ريدر المدونات ، وقد أضفت مدونتك لدى وتسعدنى متابعتك

اسعدتنى زيارتك