Sunday, February 18, 2007

ليــــه بتدون؟


انت ليه بتدون؟

سألته لنفسك قبل كده ؟
وليه المدونات بتشدنا ؟

يمكن لانها تطفل على حياه الاخر اللى منعرفوش .. ويمكن احتياجنا حد يشاركنا ولو عبر وسيله صماء حد يحس بينا .. وساعات بندور على نفسنا فى كل صفحه بنقراها

وجايز علشان كل دول مع بعض
ناس تشاركنا آلمنا و احباطتنا بس هما تخطوها وكملوا .. يعنى فى معظم كتب السيره الذاتيه بنلاقى الناس تقف عند لحظات النجاح والقوه حتى الناس اللى بتحكى تحس وكأنها ناجحه من يومها ممرتش بلحظات ضعف وارف واكتئاب واحباط وتخطيتها وقدرت تنجح

اول ما بدأت البلوج معرفتش اخليه شخصي قوى انى اكتب احساسي بالاحباط والسعاده والحب والكره ... معرفتش
حديث دار بينى وبين حد
انا : انا بفكر اعمل بلوج
بس عارفه انا متردده ليه ؟
؟ : ليه ؟
انا : يمكن لانى بخاف الناس تقرانى .. معرفش ليه ؟ يمكن علشان بخاف حد يفهمنى
؟ : اكبري بقي انتى عندك 22 سنه سيبى الكلام ده لحد مراهق عنده 16 سنه
انا " متجاهله الكلام " : يمكن اما اتحرر من خوفى ده ابقي اعملى واحد

بعد كده عرفت انى لازم اواجهه نقط ضعفى مش اخبيها عن نفسي وعن الناس
محدش اتولد بيجرى لازم نتعلم المشي الاول وحتى بعد ما نتعلم نمشي ممكن نتكعبل ونقع ... المهم نقوم تانى ونكمل

4 comments:

Mr-Biboooo said...

انا مش بسأل نفسى ليه بدون

لكن اعترف ان التدوين ساعدنى على تأمل نفسى

عالمى ازرق said...

الكلام والكتابه بيخلونا دايما نكتشف بعد اخر عن انفسنا

شكرا على مرورك

Anonymous said...

عالمى ازرق
مرسيه خالص على تشريفك لمدونتى و كلامك الجميل اللى حسسنى انك انسانه بجد و جميلة و رقيقة
اسمك جميل بس كنت خايفه يكون اسم ولد
لقيتك بنوته امورة الحمد لله
بالنسبة للبوست ده اعتقد انى بدون لانقل خبراتى للاخرين و اتعلم منهم خبراتهم و اتعرف عليهم
موضوع مهم
شكرا لكى موضوعاتك كلها جميلة مثلك داومى المرور و السلام على
حوريه

عالمى ازرق said...

حوريه
اسعدنى مرورك
المميز فى المدونات تلقائيه معظمها بتتجرد من الاقنعه
واهمها زى ماقلتى نقل الخبرات ومحاوله فهم الاخر اللى عايش معانا فى الحياه
واحيانا فهم انفسنامن خلال اللى بنقرأه
وشكرا على مرورك الرائع