ابحث .. مع الشرطه

فى الفتره الاخيره زادت قوى المشاكل مع الشرطه وده فى اعتقادى لسببين بغض النظر طبعا عن افترى بعض افراد الشرطه كمان لجهل المواطن بحقوقه القانونيه وكمان لغياب اى رادع تأديبى لمثل تلك الممارسات
احنا مش فى ايدنا التانيه بس على الاقل نقدر نعمل الاولى الناس تعرف لها ايه وعليها ايه حتى من باب العلم بالشيء ولا الجهل بيه قولت بقي احطلكوا عصاره فكرى ( طول عمرى اقول عندى موهبه الطب ) وانزل موضوع عن بعض الحالات القانونيه اللى ممكن اى حد يتعرضلها
نفترض بقي انك ماشي فى الشارع الساعه 3 بالليل وشكلك مريب ( وده الطبيعى نص البلد بقيت مريبه ) وماشي تتلفت يمين وشمال وقفك ضابط او عسكرى او مخبر المفروض قانونا يعنى : يسألك عن اللى منزلك الساعه دى ومالك بتتلفت ليه وبطاقتك يافندى ( لغايه كده الراجل عداه العيب ) سيادتك تطلع بطاقتك وجاوبت بشكل مقنع خلاص الموضوع خلص
طيب نفترض بقي ان عندك يقين انك لازم تتعامل كوزير مصرى محترم ورفضت تطلع بطاقتك هنا قانونا برضو من حقه يقتادك لاقرب قسم شرطه يعرف انت مين وخلافه
ويقتادك دى مش سهله كده دى لها شرح معناها انه يقولك اتفضل معايا وانت تروح بأرادتك الحره ومش من حقه حتى يمسكك من ايدك ( احنا لسه مبنتكلمش عن ضرب وشتيمه ) لان كده هيعد قبض مش اقتياد
تعريف القبض
هو امساك شخص من جسمه وتقييد حركته وحرمانه من حريته فى التجول كما يريد دون ان يتعلق الامر بفتره زمنيه معينه

حصلك حاجه من اللى فوق دى او الراجل وقفك جبرا اكتر من مده السؤال يبقي ده قبض ويعتبر الاجراء باطل ولا ينتج اى اثر بعده حتى لو ضبط معاك طن مخدرات
لو حد وقفك بالليل مالهوش اى حق يفتشك الا لو كنت فى حاله تلبس طبعا او رضيت عن التفتيش ده قالك هفتشك روحت رافع ايدك استعداد للتفتيش عن خوف او غير خوف من حقك تقول لا مش هتفتش
تالت احتمال بقي انك تكون معاك مخدرات ( مكنش عشمى فيك يابرعى ) و دى قررت انى بلاش اشرحها علشان محدش ياخد احتياطه لان مخارجها القانونيه كتير
فى حالات التلبس بقي لازم مأمور الضبط القضائي ( اى حد غير عسكرى ومخبر ) يدرك حاله التلبس بنفسه يعنى مينفعش المخبر يجى يبلغه ان فيه واحد معاه مخدرات يروح يفتشه على طول كده
وكونه يدركها بنفسه معناه انه يدركها بأحد حواسه ( شم , نظر , لمس , سمع , تذوق ) زى ما يشوف واحد شايل جثه بالليل اكيد مش رايح يفسحها يعنى
وانه يدركها عن طريق مشروع لا بتصنت ولا تجسس ولا تلصص ده بالنسبه للمحل الخاص ( المنازل والاماكن الخاصه يعنى ) لانه لايجوز ان يتخذ من طريق مخالفا للقانون دليلا على قيام حاله التلبس انما الاماكن العامه قهاوى كافتيريات نوادى فده عادى يابرعى لان من حق الجميع ارتيادها ومالهاش حرمه الاماكن الخاصه
والتلبس والقبض يكون فى جنايه او جنحه معاقب عليها بالحبس مده تزيد عن 3 شهور كده خرجت المخالفات من النطاق ده او صدور امر قبض ضد شخص ما
لو حاضر --------- يبقي قبض
غير حاضر ------- امر ضبط واحضار
وعدم توافر اى شرط من شروط التلبس اللى فوق يبطل اى اثر له ولا قبض ولا محاكمه والقضيه اتنسفت من اساسها
علشان التفتيش يعتد بيه بقي لازمله شروط

ثبوت حق مأمور الضبط فى التفتيش قبل اجراءه*

يعنى اما معاه اذن فى تفتيشك او انت فى حاله تلبس ريحتك مخدرات او شاف معاك مخدرات او سمعك بتفاصل مع حد بتبيعله مخدرات او انه معاه اذن من النيابه بتفتيشك ولازم تكون رتبته اعلى من عسكرى او مخبر

التزام الحدود الاجرائيه للتفتيش*

يعنى التفتيش لا يمتد الى شخص اخر غير المتهم ولا تفتيش منزله طالما الاذن صادر بتفتيشه هو او لو كنت مع واحد صاحبك تم ضبطه فى حاله تلبس مينفعش الضابط يفتشك طالما انه مأدركش منك انك معاك مخدرات ( شافها معاك او شمها منك ) الا لو صاحبك ندل بقي وقاله ياباشا انا هعترف ... انا مخبي معاه اللفه التانيه

التقييد بحدود " الغايه " التى ابيح التفتيش من اجلها*

يعنى مثلا بيدور معاك على خنجر فتشك ولقاه لو استمر فى التفتيش بعد كده ولقى اى حاجه تانيه غير قانونيه لا يعتد بها لان استمرار التفتيش يبقي باطل

نيجى لاهم نقطه بقي
الايترتب على التفتيش اهدار كرامه المتهم او ايذاؤه بدنيا او معنويا*

اول نقطه احب اقولها للبنانيت الحلوين ( علشان تعرفوا النعمه اللى انتوا فيها بس ) مينفعش حد يفتش انثى قانونا ولو كان وزير الداخليه شخصيا فلايجوز تفتيش انثى الا بأنثى ولا يعد الرضا سببا لصحه التفتيش يعنى حتى لو وافقت ان الضابط يفتشها برضو اجراء غير صيحيح حتى لو باباها او اخوها او جوزها او ابنها برضو لا يعتد بيه بيكون حكمه وكل ما ترتب عليه باطل
وكما هو واضح من الجمله لافيه ضرب ولا شتيمه ولا اى صوره من صور اهدار الكرامه واى ادعاءات منكم بغير كده تبقي اوشاعات مغرضه مصدرها النفوس الحاقده ( اموشن بنضاره شمس ) وانت اكيد .. اكيد فى مصر
ملحوظه من الملاحيظ
الحاجات دى يتم العمل بيها حتى تطبيق التعديلات الدستوريه ... والعمل بقانون الارهاب