كما يأتى العيد فى الطفولة

احساسنا بالاشياء كل مابنكبر بيختلف واحنا صغيرين مكناش شايلين همّ .. ولاننا كل ما بنكبر الهموم بتتراكم اكثر وتاخد من فرحتنا بالاشياء فبنفقدها بالتدريج

زى العيد .. العيد هو نفسه العيد بتاع زمان اللى بيفرق بس ان احنا اللى بنتغير
الا انى العيد عايزه افرح بيه بجد , العيد موجود علشان نفرح بيه ومش كل عيد هقدمله اعتذار علشان هو بيجى بفرحته وانا بكسرها .. لذا حاولت استعادت مشاعرى وانا صغيره بالعيد


وانا صغيره كانت ليا طقوس خاصه فى كل عيد من اول مااخليهم يلفوا فى البيت اسبوع متواصل علشان اشترى حاجه جديده وفى الاخر اخليهم يجيبولى الحاجه اللى شفناها اول يوم
وحتى البلاوى المتنوعه اللى كنت برتكبها كل عيد

فى عيد من ذات الاعياد كنت حوالى 8 سنين كنت ألبس هدوم العيد وانزل يسألونى فى البيت ( فى خلفيه المعلومات انا من اسكندرية ) هتروحى لغايه فين ؟؟ اقولهم هروح انا وداليا ( اكيد صاحبتى يعنى ) الاهرامات بابا يعاملنى كأى طفل معاق ذهنيا ويقوللى طيب ياحبيبتى بس متتأخريش
المهم انزل اقابل داليا والبنت بكل براءه تسألنى : هنروح فين ؟؟

انا : هوديكى الاهرامات

البنت ياولداه تذبهل وتقوللى : اللى بيطلع فى التليفزيون !!!؟
نقف على اول الشارع نوقف تاكسي فالبنت بحرج تقوللى : هو بعيد ؟ اصل انا معييش غير جنيه
ارد عليها بثقه اللى فى جيبه ثروه : متقلقيش انا معايا اتنين جنيه
وكل ما تاكسي يعدى اشاورله يهدى قدامنا اقوله الاهرامات لو سمحت يقوم ماشي ( صدقونى اما كبرت كنت نفسي اعرف انطباعات سواقيين التاكسي وانا بقولهم الاهرامات ) , الاطفال تمر قدامنا رايحين يتمرجحوا نسلم عليهم ونعتذرلهم لاننا رايحين الاهرامات ومنهم اللى يشبط طبعا اقولهم النهارده هودى داليا وانتوا بكره بقي ( ولا كأنى مرشد سياحى )
نفضل كده لمدة ساعه لغايه ما ايأس اقولها خلاص تعالى نلعب فى دخله البيت وبكره نروح , ويتكرر نفس السيناريو بقيت ايام العيد كان طموحاتى كبيره اوى ياجماعه ( حلم قومى لسه متحققش والله ) اروح الهرم واركب جمل واتصور
وطبعا - و بكل امل فى الغد – معايا الاتنين جنيه اللى هيحققولى طموحاتى
ويخلص العيد ومروحش يفهمونى فى البيت بقي ان التاكسي مش بيقف علشان شايفنا صغيرين ارد عليهم بأستنكار : مع انى كنت هدفعله يعنى !!!!

* * * * * * * * * * * * * * * * * * *

كل عام وانتم جميعا بخير وجميع اهلنا فى العراق وفلسطين وكل المسلمين , اللهم فرح قلوبهم بالعيد واعزهم بنصرك يارب العالمين

* * * * * * * * * * * * * * * * * * *

على الهامش
سأدخل الفتره المقبله فى مرحلة بيات فكرى وذلك حيث الامتحانات والشقا والتعب والارهاق بتاع زمان
لذا اسألكم الدعاء لى بظهر الغيب ان يوفقنى الله