لو كان ... هيكون ايه ؟

حياه الاشياء

كل حاجه لها دوره حياه لو تخيلناها بشكل مختلف هتكون ازاى مثلا لو كل الجمادات اللى حواليك اتكلمت لمده 24 ساعه ممكن تقول ايه ( هتطلع الكبت المزمن منكم طبعا ) سريرك اوضتك قلمك اوراقك هدومك
على سبيل الفانتازيا
سريري : اصحي الساعه 11 بطلوا افترا بقي ... بقالك 10 ساعات نايمه عايز اخد نفسي يااخوانا !!!
الحنفيه : برضو نسيتى تغسلى سنانك ... ما تنضفوا بقي
بلوزتى المفضله : بقالك اسبوع لازقه فيا .. ايه مبتزهقيش ؟ حظ ايه المهبب ده يارب اللى وقعنى فيها انا كده هدوب خلال شهرين بالكتير
كتير من الحاجات اللى حوالينا مهمه قوى بس يمكن احنا مفكرناش بقيمتها حسيت بده اما قريت قصيده لاحمد مطر عن الابواب وحاولت اتخيل حياتنا من دون ابواب ولا نوافذ .. صعبه .. مش كده ؟
بالمناسبه فيه اشخاص مهمين بحياتنا بس برضو مفكرناش بقيمتهم

* * * * * * * * *

مرآه الروح

لو لقيت مرايه تشوف فيها روحك ... الاماكن المظلمه والمضيئه فيها ... تفتكر ممكن تشوف حقيقتك ؟ هتقدر تواجهها ؟ ببشاعتها او روعتها ؟
الروح انا اقصد بيها شخصياتنا صفاتنا عيوبنا الشيء الزئبقي اللى جوانا اللى دايما بيتغير لاسوأ او افضل

* * * * * * * * *

روح الاماكن

اول مره اتعرف على التعبير ده كان د / احمد خالد توفيق فهمت من خلال التعبير ده احساسي اما بروح اماكن ما خاصه الاماكن الاثريه او المتاحف دايما بتسائل عن الناس اللى مروا او عاشو بنفس المكان اللى بزوره كانوا سعدا كانوا بيؤمنوا بايه حياتهم كان شكلها ايه .
هل الاماكن بتفرح وتحزن حتى لو بطريقه مختلفه ؟
يعنى انا بحب بيتنا قوى ( عشره بقي ياجماعه اتولدت واتربيت فيه ) وبفرح اما ارجع من بره وادخل اوضتى وبحس انها كمان فرحت بيا ( لازم طبعا ) و حسيت انى نفسي احضن اماكن كتير ... وكمان حسيت بأماكن بتحضنى .. اماكن نشيطه ومبهجه واماكن كئيبه ومقبضه
طيب عمرك روحت مكان بتحب تزوره كتير وانقطعت عنه لفتره ولقيته اتغير ولومته انه اتغير ؟

انا شوفت ناس كتير بتعمل كده دى عاده الانسان دايما شماعه اخطاءه
التغيير هو اساس الحياه كل حاجه بتتغير الاماكن والاشخاص وكل شيء بس احنا الشيء الحر عن المكان اللى بنملك نزوره او لا ورغم غيبتا عن مكان بنحبه اول شيء بنعمله اما نرجع اننا نلومه انه تغير كأننا عايزين نثبت الكون عند رحيلنا مع انه هو اللى من حقه يلومنا اننا بعدنا